(tikang sa public broadcast san dySM Aksyon Radyo Balita Numero Uno, Marso 24, 2006. Diri segurado kun tama an spelling san mga ngaran ngan apelyido san mga personahe dinhi.)
Ginkundenar ni Fr. Cecilio Lucero, chairman san human rights desk san Social Action san Diocese san Catarman an panibag-o na liwat sin kuno mga pag-abuso san militar didto sa sayo nga barangay sa bungto san Bobon. Sa interview san dySM News sa kanya sadton naglabay nga adlaw ginkumpirmar sini an report nga pagkastigo san mga myembro san SOT san Charlie Company san 20th IB sin sayo nga parag-uma nga nakilala sa ngaran nga Crisostomo Montaòo nga na-confine sa NSPH tungod san injuries nga natagamtaman sini. Iginpahayag pa ni Fr. Lucero nga kuno diri la ini si Crisostomo Montaòo an bag-o nga biktima san mga panngastigo san mga sundalo kundi kuno lima ini nga mga biktima, upod na sini si Mano Crisostomo. An iba pa nga mga ginkastigo san kuno mga sundalo mao in ginkilala sa ngaran ni Fr. Lucero nga sira Jovy Sinocbit, Johnny Pigar, sayo nga Boy, ngan an na-confine nga si Crisostomo Montaòo, ngan an ikalima mao in sayo nga nakilala sa ngaran nga Juan Rivera nga kuno hasta ngada yana waray pa ini mahiaagii san pamilya. Iginpahayag pa ni Fr. Lucero nga an biktima nga si Mano Crisostomo Montaòo amo in ada yana sa pag-ataman san Singbahan Katoliko sa bungto san Bobon tungod san kuno nahahadok ini nga bangin in patayon san mga militar tungod kay kuno antes ini ginbuhian san mga militar gintugon ini nga diri magsumat bisan kunay kay kun magsusumat ini papatayon kuno san mga militar an kanya pamilya. [Parte san interview kan Fr. Lucero:]
“…nagtawag sa aton opisina, partikular ini nga usa na liwat nga biktima didto sa Brgy. Kalantyaw san munisipalidad san Bobon, nga diin aton man nakita kahapon an iya kamutangan dida sa general hospital, ngan klaro kaupay dida san mga pagpahayag an nabalik na liwat nga mga pag-abuso san mga tropa militar nga adto yana presente nga nakadistino sa Brgy. Kalantyaw sa munisipyo san Bobon. Sobra-sobra an naeksperyensyahan nga pag-abuso sa iya, ngani diri la iton siya, lima ini sira ngatanan nga mga biktima sin mga pagkastigo, pagtarhog san mga sundalo nga ada yana presente nga na-assign sa Brgy. Kalantyaw san Bobon.”
Ginkundenar liwat ni Fr. Lucero an kuno natindog komo leader o commanding officer san Charlie Company nga adto yana nakabase sa Brgy. Kalantyaw san nasabi nga bungto sin pagsugad nga kuno mismo an CO san SOT amo in nagpapabaya san kanya mga tawo ngan kuno ginpipiyungan la sini an mga ginhihimo nga mga pag-abuso san kanya mga tawo nga diin taga-Bobon man ta kunta siya nga mao kunta kuno an angay nga manalipod san katungod san mga Bobonanon tungod kay taga-Bobon man siya. An gin-uunabi ni Fr. Lucero nga leader san Charlie Company ngan san SOT nga naka-assign sa Brgy. Kalantyaw mao si 2Lt. Salanggoste. [Parte san interview kan Fr. Lucero:]
“Lima ini sira nga biktima segun san aton mga pagpakiana sa mga tawo nga nangingila sa mga biktima ngan san mga tawo nga taga-didto gud liwat mismo nga ada yana sa poblasyon san Bobon. An iba sini mayaon Jody Sinocbit, an primero ini nga gintawag san mga sundalo nga nakatagamtam liwat sin mga pagkastigo. Ikaduha mayaon ngaran nga Johnny Pigar. Ikatulo mayaon a certain Boy, basta Boy an ngaran. An ikaupat an kahapon nga aton na-interview, si Crisostomo Montaòo. An ikalima mao si Juan Rivera, usa nga masakitnon nga hasta yana wara pa ini maaagii san mga igkasi niya taga-Brgy. Kalantyaw. Pero positibo nga siya gin-imbitaran san mga sundalo pareho san panhitabo san upat nga siya ginkulong, siya gin-imbestigaran, ngan pareho san upat nakatagamtam sin mga pag-abuso san mga militar nga ada yana assigned sa Brgy. Kalantyaw.”
Reporter: “Maaram ka, Father, kun nano nga unit ini san militar nga ada?”
Fr.: “Ini nga unit nga militar nga ada yana presente nag-ooperate sa Brgy. Kalantyaw amo ini an kaapi pa san battalion san 20th IB nga adto an battalion headquarters sa Salvacion, San Isidro, Northern Samar sa ilarum san pamumuno ni Col. Fernandez. Ngan ini nga tropa nga ada nag-aabuso san aton mga pobrehanon nga mga kabugtoan sa ilarum ini san kumpaniya san Charlie Company san 20th IB.”
R: “Sin-o an kuan sini, bale an leader nira?”
Fr.: “Dihan sini an ginngangaranan san aton kabugtoan nga identified tungod kay an pinakamasakit pa sini an team leader nira a certain Lt. Salanggoste nga taga-Bobon mismo, amo ini namumuno yana dida sa mga militar, nga pinipiyungan niya, kinokonsenti niya an mga pag-abuso san iya tropa san iya mismo ngani igkasi mga
taga-Bobon.”