(tikang sa public broadcast san dySM Aksyon Radyo Balita Numero Uno, second week san Marso, 2006. Diri segurado kun tama an spelling san mga ngaran ngan apelyido san mga personahe dinhi.)

Evacuees san upat nga mga barangay san bungto san Bobon nagkabalik na sa kanra tagsa-tagsa nga mga lugar kahuman sin haros duha kasemana nga pagkaka-displace tungod san military operation sa kanra lugar. Mao ini an nahibaruan san dySM News san interview kan Mayor Elena Balite san bungto san Bobon kahapon. Sumala sa kanya nga sadto pa nga Miyerkules, Marso 8 sini nga tuig ginpabalik na nira an mga residente san upat nga mga barangay tungod san paghatag sin kaseguradohan o assurance san seguridad sini ni Col. Jonathan Ponce, executive officer san 803^rd Brigade. Sumala kan Mayor Balite nga nagkadto si Col. Ponce sa kanya opisina ngan nagsugad nga poyde na magpakabalik an mga residente san upat nga mga interior barangay sanglit, dugang pa ni Mayor Balite, nga sadto mismo nga Miyerkules nagkabalik na sa kanra mga barangay an mga evacuees ngan mga residente. Dugang pa ni Mayor Balite nga OK na subay sa kanya nakuha nga impormasyon nga waray na problema ngan maupay na kuno an kamutangan san mga evacuees. [Parte san interview kan Mayor Balite:]

“An mga evacuees adto na pinauli na. An nagkuan, kan Col. Ponce kay nakadi sa amon opisina, nag-istorya na kami nga maupay na man kuno didto an kamutangan so sadto nga 8 ginpauli na namon. OK na man, nagpakiana ako impormasyon ngadto kun nano na ira kamutangan, OK na man sira.” 

Mahinunumdoman nga nag-evacuate an mga residente san upat nga mga interior barangays nga mao an Brgy. E. Duran, Trujillo, Kalantyaw, ngan Santander kahuman nga magkayaon sin military operation sa kanra lugar ngan mahinabo an serye sin mga encounter sa giutan san mga rebelde nga NPA ngan mga sundalo san gobyerno nga nagresulta sin pagkamatay sin duha nga sundalo ngan sugadman san mga rebelde. Dumagsa an mga residente san nasabi nga upat nga mga barangay sa bungto san Bobon ngan an iba mao in temporaryo nga nag-istar sa municipal hall san Bobon samtang an iba naman nga mayaon mga kauropdan sa bungto mao in temporaryo nga nakiistar sa kanra mga kauropdan. Tungod siton nagdeklarar si Mayor Balite sin state of calamity ngan naggawas sin pondo an municipal government para san pagkaon ngan mga personal nga pagkinahanglan san mga evacuees. Mismo si Mayor Balite an nanguna san pagpanginano san mga evacuees labi na gud san pagkaon. Ngan san ginbuhat nga dialogue sa giutan san military, Singbahan, LGU ngan iba pa nga mga sektor ginpahayag ni Col. Ponce nga sadto nga Miyerkules kanra na pababalikon an mga residente ngan natuman subay san pahayag kahapon ni Mayor Balite.