(tikang sa public broadcast san dySM Aksyon Radyo Balita Numero Uno, Marso 25, 2006. Diri segurado kun tama an spelling san mga ngaran ngan apelyido san mga personahe dinhi.)

Biktima sin kuno panngastigo san mga sundalo didto sa Brgy. Kalantyaw, Bobon sini nga probinsya makadanay nalilipat ngan diri na nangingila tungod san inabot sini nga suol sa ulo tungod san kuno pagbalbaga sa kanya sin kahoy. Mao ini an padayon nga pahayag ni Mano Crisostomo Montaòo san interview san local media sa kanya. Sumala sa kanya nga sa yana danay kuno diri na siya nahihinumdom san ngaran san kanya pamilya kun nagsusuol an kanya ulo. Dugang pa niya nga siton mismo nga takna san siya mao in kuno nakadto pa sa sulod san kwarto san balay nga gin-istaran san mga sundalo ginpreso siya, gin-gapos ngan ginpiringan an mata ngan ginkinastigo danay kuno diri na siya nahinunumdom san ngaran san kanya asawa ngan anak tungod san kinastiguhan sa kanya. Ngan sa yana sumala pa sa kanya nga magsasang-at siya sin reklamo kontra san mga sundalo nga kuno nagkastigo sa kanya sa bulig ni Fr. Cecilio Lucero, an chairman san human rights desk san Diocese san Catarman nga kanya gin-aruan sin bulig para magkondukto sin imbestigasyon bahin san nasabi nga insidente. Sumala pa kan Mano Crisostomo nga karuyag niya nga matagan sin leksyon an mga sundalo nga nagkastigo sa kanya. [Parte san interview kan Mano Crisostomo:]

Reporter: “So mao nga nadara ka ngadi sa hospital kay natumba ka san pagkastigoha sa im?”

CM: “Oo. Wara na ak siton abat kay didto na ak sa pasakay siton katumba. Pati ngani sa pagkinastigoha nira sa ak, pakianhan ak san ak pamilya wara na ngani ak siton hinumdom san mga ngaran. Bagaw sa ak ‘kuan ka gud nga tawo, di ka gud bagaw doon sa iyo panimalay nagpipirmi, bagaw kay pati ngani im pamilya di ka na nanhihibaro sa mga ngaran.’ …Kay sin-o ba makakahinumdom siton nga para-para na ak pamati.”

R: “So bale an imo yana samad diin, sa ulo?”

CM: “Wara samad, pero kay, oo……”

R: “So yana nano an imo plano sini, magrereklamo ka?”

CM: “Kay poyde gad tungod sa kun nano man, hatagan man sira sin disiplina san gobyerno kay kun nano nga kanra ak ginkastigo nga wara man ak kasal-anan. Pagpaamin la sa ak kanra tuyo, maiton an kanra tuyo.”

Iginbulgar liwat ni Mano Crisostomo nga kuno sa ira barangay diri la siya an biktima sin panngastigo. Sumala pa sa kanya nga damo na kuno an nabiktima didto sa iya barangay sin pankastigo san mga sundalo. Dugang pa niya nga mayaon na sayo nga kuno napalengke tungod san panngastigo san mga sundalo. Pero dugang pa niya nga diri kuno iton nahibabaruan didto tungod kay gintutugon san mga sundalo an ginkastigo sini nga diri magsumat bisan kunay ngan kun magsumat segurado kuno nga papatayon. [Parte san interview kan Mano Crisostomo:]

“Damo. An ako bati la san dinhi na damo kay yaon na ngani kun napalengke sa kanra inkastigo lat, Juan kun nga ginbibinansagan ‘Atay’…Wara kun iton yana sasabuta palengke na. Kanra, kuan iton, tanod nga Juan, kanra ginkastigo, suruguon iton nira, dida siton, tanod iton. Katapos kanra pa ginkastigo, palengke na kun iton yana. Tapos ito ak kumpadi kanra lat ginkastigo…Johnny.”